ការរៀបចំសង្ក្រាន្តឆ្នាំថ្មីនៅសាលាជនបទក្នុងខេត្តកំពតធ្វើឡើងគោរពតាមវប្បធម៌ទំនៀមទម្លាប់ប្រពៃណីសាសនាបានល្អប្រសើរ

ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ សាលារៀនគ្រប់កម្រិតនៅទីជនបទក៏បានរៀបចំសង្ក្រាន្តឆ្នាំថ្មីផងដែរ។ ជាក់ស្តែងសិស្សានុសិស្ស និងនាយកសាលាវិទ្យាល័យ ហ៊ុន សែន បឹងព្រះ ស្ថិតក្នុងស្រុកទឹកឈូ បានបង្ហាញក្តីសប្បាយរីករាយយ៉ាងខ្លាំង និងថាទោះជាសង្ក្រាន្តនៅសាលាពួកគាត់មិនធំដុំដូចសាលានៅក្នុងក្រុងក៏ពិតមែន ប៉ុន្តែការគោរពវប្បធម៌ ទំនៀមទម្លាប់ប្រពៃណីសាសនាបានល្អប្រសើរ។

សិស្សានុសិស្សថ្នាក់ទី១២នៃវិទ្យាល័យ ហ៊ុន សែន បឹងព្រះ ស្ថិតក្នុងស្រុកទឹកឈូ ខេត្តកំពត បានលើកឡើងថា ពួកគាត់ពិតជារីករាយ និងថ្លែងអំណរគុណយ៉ាងជ្រាលជ្រៅដល់លោកគ្រូអ្នកគ្រូ ដែលបានជួយជ្រោមជ្រែងក្នុងការរៀបចំសង្ក្រាន្តប្រកបដោយភាពសប្បាយរីករាយដែលមានអត្ថន័យខ្លឹមសារអប់រំ និងអនុស្សាវរីយ៍ដ៏សប្បាយរួមគ្នាមិនអាចបំភ្លេចបាន។ សិស្សានុសិស្សបានបន្តថា បើទោះបីសាលារបស់ពួកគេមិនទាន់អាចរៀបចំសង្ក្រាន្តឆ្នាំថ្មីឱ្យបានធំដុំដូចសាលានៅក្នុងក្រុងក៏ដោយ ក៏ពួកគេសប្បាយចិត្តក្នុងការរួមគ្នាបង្កើតឱ្យមានសង្ក្រាន្តឆ្នាំថ្មីនេះឡើង ដើម្បីបង្ហាញនិងថែរក្សាវប្បធម៌ ទំនៀមទម្លាប់ប្រពៃណីជាតិខ្មែរ។ មិនតែប៉ុណ្ណោះសង្ក្រាន្តឆ្នាំថ្មីនៃវិទ្យាល័យ ហ៊ុន សែន បឹងព្រះនេះ ក៏បានបង្ហាត់បង្ហាញពីការលេងល្បែងប្រជាប្រិយខ្មែរជាច្រើនប្រភេទ ពិសេសមានការនិមន្តព្រះសង្ឃដើម្បីធ្វើពិធីតាមបែបសាសនា និងរាប់បាត្រឧទ្ទិសមគ្គផលជូនដល់បុព្វការីជនដែលបានបាតបង់ជីវិតទៅផងដែរ។

ចំណែកឯលោក ប៉ូ សារិទ្ធ នាយកវិទ្យាល័យ ហ៊ុន សែន បឹងព្រះ បានឱ្យដឹងដែរថា វិទ្យាល័ហរបស់លោកបានរៀបចំសង្ក្រាន្តឆ្នាំថ្មីជារៀងរាល់ឆ្នាំ  ទោះបីជាសង្ក្រាន្តមិនមានលក្ខណៈធំដុំ ដូចសាលានៅក្នុងក្រុងក៏ពិតមែន ប៉ុន្តែលោកគ្រូ អ្នកគ្រូ រួមនឹងសិស្សានុសិស្សទាំងអស់ រក្សាបាននូវកេរដំណែល និងតម្លៃវប្បធម៌ ប្រពៃណីទំនៀមទម្លាប់ និងសាសនាបានល្អប្រសើរ ហើយសិស្សានុសិស្សគ្រប់កម្រិតបានចូលរួម និងមិនបានលេងល្បែងអ្វីដែលខុសឆ្គង ឬធ្វើឱ្យប៉ះពាល់ដល់វប្បធម៌ប្រពៃណី ឬសណ្តាប់ធ្នាប់សង្គមនោះទេ។

សូមបញ្ជាក់ថា សង្ក្រាន្តឆ្នាំថ្មីនៅតាមសាលារៀន និងតាមវិទ្យាល័យនានាក្នុងខេត្តកំពតឆ្នាំនេះ មានការរៀបចំបានច្រើន ហើយផុសផុលជាងឆ្នាំមុនៗ ខណៈដែលថ្នាក់ដឹកនាំខេត្តកំពត និងអាជ្ញាធរក្រុង-ស្រុក បានធ្វើការជំរុញ និងលើកទឹកចិត្តពលរដ្ឋឱ្យរួមគ្នាលើកកម្ពស់ និងផ្សព្វផ្សាយតម្លៃវប្បធម៌ អរីយធម៌ ប្រពៃណីទំនៀមទម្លាប់ និងសាសនាជាតិ តាមរយៈជីវភាពរស់នៅប្រចាំថ្ងៃ ពិសេសក្នុងឱកាសបុណ្យទានធំៗ មានបុណ្យចូលឆ្នាំថ្មីប្រពៃណីជាតិខ្មែរ និងភ្ជុំបិណ្ឌជាដើម ដើម្បីឱ្យទេសចរជាតិ និងអន្តរជាតិបានឃើញ និងស្វែងយល់៕

អត្ថបទ និងរូបភាព៖ មន្ទីរព័ត៌មានខេត្តកំពត