ករណីក្រុមហ៊ុន "កាស៊ីណូខ្ញុំ" បង្ហូរទឹកកខ្វក់ចេញមកខាងក្រៅត្រូវមន្ត្រីបរិស្ថានចុះពិនិត្យនិងណែនាំឱ្យបញ្ឈប់

កាលថ្ងៃទី២៥ ខែមីនា ឆ្នាំ២០២៥ ក្រុមមន្ត្រីជំនាញក្រសួង និងមន្ទីរបរិស្ថានខេត្តកំពត រួមទាំងអាជ្ញាធរស្រុក និងឃុំ ភូមិ បានចុះពិនិត្យទីតាំងកាស៊ីណូខ្ញុំ ស្ថិតនៅក្នុងភូមិលក ឃុំឫស្សីស្រុកខាងលិច ស្រុកកំពង់តា្រច ខេត្តកំពត ដែលបានបង្ហូរកាកសំណល់រាវបង្កឱ្យមានក្លិនស្អុយ ប៉ះពាល់ដល់ការរស់នៅរបស់ប្រជាពលរដ្ឋជុំវិញនោះ។ មន្ត្រីជំនាញបានណែនាំឱ្យរៀបចំប្រព័ន្ធលូបង្ហូរទឹក សាងសង់អាងប្រព្រឹត្តកម្មទឹកកខ្វក់ និងហាមបង្ហូរទឺកចេញក្រៅបន្តទៀត។

ប្រធានមន្ទីរបរិស្ថានខេត្តកំពត លោក អេង ប៉ូឡូ បានប្រាប់ឱ្យដឹងថា បន្ទាប់ពីទទួលបានដំណឹងពាក់ព័ន្ធការបង្ហូរទឹកកខ្វក់ចេញពីក្រុមហ៊ុន "កាស៊ីណូខ្ញុំ" បង្កឱ្យមានក្លិនស្អុយប៉ះពាល់ដល់អនាម័យបរិស្ថាន និងការរស់នៅរបស់ប្រជាពលរដ្ឋដែលមានលំនៅឋានជុំវិញកាស៊ីណូប្រមាណ ៩គ្រួសារ។ មន្ត្រីជំនាញមន្ទីរបរិស្ថានបានចុះពិនិត្យ និងបានណែនាំនូវលក្ខណៈបច្ចេកទេស និងវិធានការគាំពារបរិស្ថានជាច្រើនជំហានរួចមកហើយ ជាក់ស្តែងពេលនេះ មានទាំងមន្ត្រីជំនាញខាងក្រសួងបរិស្ថាន មន្ទីរបរិស្ថាន អាជ្ញាធរស្រុក និងឃុំ ភូមិ ផងដែរ ដើម្បីពិនិត្យមើលវឌ្ឍនភាពនៃការរៀបចំរបស់ក្រុមហ៊ុន ដើម្បីលប់បំបាត់ការបង្ហូរទឹកកខ្វក់ចេញមកខាងក្រៅបរិវេណកាស៊ីណូ ឬបង្ហូរចូលព្រែក រួមទាំងពិនិត្យលើការគ្រប់គ្រងសំរាមផងដែរ។

លោកប្រធានមន្ទីរបានបន្តថា ខេត្តកំពតក្រោមការដឹកនាំរបស់ឯកឧត្តម ម៉ៅ ធនិន លោកតែងតែជំរុញណែនាំអាជ្ញាធរ មន្ទីជំនាញពាក់ព័ន្ធ កងកម្លាំង ប្រជាពលរដ្ឋ ឱ្យរួមគ្នាលើកកម្ពស់អនាម័យបរិស្ថាន ទាំងនៅទីតាំងឯកជន និងទីសាធារណៈ ដើម្បីទាក់ទាញទេសចរឱ្យមកលេងខេត្តកំពត។ ហើយកន្លងមកមន្ទីរបានខិតខំប្រឹងប្រែង និងចុះជំរុញ ណែនាំដល់បណ្តាអាជីវកម្ម ឬសេវាកម្ម ដើម្បីធ្វើកិច្ចសន្យាគាំពារបរិស្ថាន។

យ៉ាងណាក៏ដោយ គេនៅមិនទាន់ដឹងថា តើទឹកកខ្វក់បំភាយក្លិនស្អុយនោះ មានផលប៉ះពាល់យ៉ាងណាដល់បរិស្ថាន និងសុខភាពរបស់ប្រជាពលរដ្ឋនៅឡើយទេ ខណៈដែលមន្ត្រីជំនាញក្រសួងបរិស្ថាន ទើបបានយកទឹកកខ្វក់នោះទៅពិនិត្យនៅមន្ទីរពិសោធន៍ ដើម្បីញែករកសារធាតុពុល និងផលប៉ះពាល់ផ្សេងៗ៕

អត្ថបទ និងរូបភាព៖ មន្ទីរព័ត៌មានខេត្តកំពត