ស្នងការដ្ឋាននគរបាលខេត្តកំពតចេញសេចក្ដីប្រកាសព័ត៌មានចំពោះការចុះផ្សាយរបស់សារព័ត៌មាន The Cambodia Daily Khmer

នៅព្រឹកថ្ងៃទី២៥ ខែតុលា ឆ្នាំ២០២៤ ស្នងការដ្ខាននគរបាលខេត្តកំពត បានចេញសេចក្តីប្រកាសព័ត៌មាន ពាក់ព័ន្ធនឹងការចុះផ្សាយរបស់សារព័ត៌មាន The Cambodia Daily Khmer ដែលបានសរសេរថា "ពលរដ្ឋចំនួន១០នាក់រួមទាំងព្រះសង្ឃផង ត្រូវបាន សមត្ថកិច្ចចាប់ បញ្ជូនខ្លួនទៅស្នងការខេត្តកំពតភ្លាមៗ អំឡុងពេលដែលពួកគធ្វើការ ផ្សព្វផ្សាយពីខ្លឹមសារកិច្ចព្រមព្រៀងសន្តិភាពទីក្រុងប៉ារីស ដើម្បីអបអរសាទរខួបលើកទី ៣៣ឆ្នាំ នៅថ្ងៃពុធនេះ។"

សេចក្តីប្រកាសព័ត៌មានរបស់ស្នងការដ្ឋាននគរបាលខេត្តកំពតមានខ្លឹមសារដូចតទៅ៖ ស្នងការដ្ឋាននគរបាលខេត្តកំពត សូមជម្រាបជូនសាធារណជន អ្នកសារព័ត៌មាន ពិសេសបណ្ដាញ ទំនាក់ទំនងសង្គមមេត្តាជ្រាបថា៖ កាលពីថ្ងៃទី ២៣ ខែតុលា ឆ្នាំ ២០២៤ វេលាម៉ោង ៨:០០នាទី កម្លាំងអធិការដ្ឋាននគរបាល ក្រុងកំពត នៃស្នងការដ្ឋាននគរបាលខេត្តកំពត បានទទួលព័ត៌មានថា មានប្រជាពលរដ្ឋ និងព្រះសង្ឃប្រមាណ ១០ នាក់ បានប្រមូលផ្ដុំគ្នាមកផ្សាយបន្តផ្ទាល់ (Live Video) អំពីខ្លឹមសារកិច្ចព្រមព្រៀងសន្តិភាព ទីក្រុងប៉ារីស នៅចំណុចរូបសំណាកព្រះអង្គឌួង ឋិតនៅភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត។ លុះនៅថ្ងៃខែឆ្នាំដដែល វេលាម៉ោង ៨:៣០ នាទី កម្លាំងអធិការដ្ឋាននគរបាលក្រុងកំពត បាន អញ្ជើញប្រជាពលរដ្ឋចំនួន ១០នាក់ ស្រី ០៣នាក់ ក្នុងនោះព្រះសង្ឃ ០១អង្គ ពាក់ព័ន្ធករណីបានមកផ្សាយបន្តផ្ទាល់ (Live Video) អំពីខ្លឹមសារកិច្ចព្រមព្រៀងសន្តិភាពទីក្រុងប៉ារីស នៅចំណុចរូបសំណាក ព្រះអង្គឌួង ឋិតនៅភូមិសុវណ្ណសាគរ សង្កាត់កំពង់កណ្តាល ក្រុងកំពត ខេត្តកំពត ដោយមិនបានស្នើសុំ ឬ ក៏ជូនដំណឹងឲ្យសមត្ថកិច្ច និងអាជ្ញាធរមូលដ្ឋានដឹងជាមុន។

ក្រោយពីបានសួរនាំរួច សមត្ថកិច្ចបានធ្វើកិច្ចសន្យាអប់រំ និងឲ្យត្រលប់ទៅលំនៅឋានវិញរៀងៗខ្លួន មិនដូចការចុះផ្សាយរបស់សារព័ត៌មាន The Cambodia Daily Khmer ឡើយ។ អាស្រ័យហេតុនេះ សូមសាធារណជន អ្នកសារព័ត៌មាន ពិសេសបណ្ដាញទំនាក់ទំនងសង្គមមេត្តាទទួលជ្រាបជាព័ត៌មាន៕

អត្ថបទ៖ មន្ទីរព័ត៌មានខេត្តកំពត