ប្រព័ន្ធផ្សព្វផ្សាយបានដើរតួនាទីយ៉ាងសំខាន់ក្នុងការបង្កើន និងជាការយល់ដឹងរបស់សាធារណជនចំពោះកិច្ចសហប្រតិបត្តិការមេគង្គ-ឡានឆាង ហើយក៏ជាមធ្យោបាយដ៏មានសារៈសំខាន់ក្នុងការចែករំលែកនូវព័ត៌មានទាក់ទងនឹងសេដ្ឋកិច្ច នយោបាយ សង្គម និងវប្បធម៌ នៃប្រទេសជាសមាជិក។ នេះជាការលើកឡើងរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌ ក្នុងពិធីបើកដំណើរទស្សនកិច្ចវគ្គបញ្ចប់របស់អ្នកសារព័ត៌មាន នៃបណ្តាប្រទសតាមដងទន្លេមេគង្គ-ឡានឆាង ក្រោមប្រធានបទ "ទន្លេរួម អនាគតរួម" នៅសណ្ឋាគារសុខា ខេត្តព្រះសីហនុ នាព្រឹកថ្ងៃសុក្រ ១៥កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៩ ខែកញ្ញា ឆ្នាំ ២០២៣ ដោយមានការចូលរួមពីឯកឧត្តម Wu Chuanbing អគ្គកុងស៊ុលចិនប្រចាំកម្ពុជា ឯកអគ្គរដ្ឋទូតនៃសាធារណរដ្ឋប្រជាធិបតេយ្យប្រជាមានិតឡាវប្រចាំកម្ពុជា និងអ្នកសារព័ត៌មាន។
ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មានបានគូសបញ្ជាក់ថា តម្លៃ និងសារៈសំខាន់នៃប្រព័ន្ធផ្សព្វផ្សាយ និងសារព័ត៌មានត្រូវបានមើលឃើញរឹតតែច្បាស់នៅពេលប្រទេសជាតិជួបប្រទះនូវបញ្ហាអសន្តិសុខ សង្គ្រាម ឬវិបត្តិសុខភាពសាធារណៈដូចជាជំងឺកូវីដ-១៩ ជាដើម។ ឯកឧត្តមបានថ្លែងថា កម្មវិធីដំណើរទស្សនកិច្ចរបស់អ្នកសារព័ត៌មាន នៃបណ្តាប្រទសតាមដងទន្លេមេគង្គ-ឡានឆាងក្រោមប្រធានបទ "ទន្លេរួម អនាគតរួម" គឺបង្ហាញពីកិច្ចសហប្រតិបត្តិការមេគង្គ-ឡានឆាង (Mekong-Lancang Cooperation) ត្រូវបានបង្កើតឡើងនៅឆ្នាំ២០១៦ ក្នុងក្របខណ្ឌភូមិសាស្ត្រ យុទ្ធសាស្ត្រថ្មីមួយទៀតដែលមានលក្ខណៈពិសេសប្លែកដែលជំរុញដោយកម្លាំងផ្ទៃក្នុង នៃបណ្ដាប្រទេសតាមដងទន្លេមេគង្គដែលមានប្រជាជនសរុបប្រមាណ ១.៦ពាន់លាននាក់ ។ ឯកឧត្ដមលើកឡើងថា ទន្លេមានប្រភពនៅតំបន់ទីបេ ដែលចិនហៅថា ទន្លេឡានឆាង បានហូរកាត់ប្រទេសចំនួន៥ រួមមានមីយ៉ាន់ម៉ា ឡាវ ថៃ កម្ពុជា និងវៀតណាម ក្នុងចម្ងាយ ៤៨៨០គីឡូម៉ែត្រ ហើយប្រទេសទាំង៦ ដែលបានតភ្ជាប់ភូមិសាស្ត្រដោយភ្នំ និងទន្លមានវប្បធម៌ទំនៀមទំលាប់ប្រហាក់ប្រហែលគ្នា មិត្តភាពរឹងមាំ និងជាអ្នក ជិតខាងល្អ។
ឯកឧត្ដមរដ្ឋមន្រ្ដីថ្លែងបញ្ជាក់ទៀតថា កិច្ចសហប្រតិបត្តិការក្នុងតំបន់នេះ រួមចំណែកក្នុងការអភិវឌ្ឍសេដ្ឋកិច្ចសង្គម និងប្រទេសអនុតំបន់ និងលើកកម្ពស់សុខុមាលភាពរបស់ប្រជាជន ហើយគាំទ្រដល់ការកសាងសហគមន៍អាស៊ាន និងដំណើរការសមាហរណកម្មក្នុងតំបន់ប្រកបដោយចីរភាពរបស់អង្គការសហប្រជាជាតិឆ្នាំ២០៣០។ ឯកឧត្តមរដ្ឋមន្ត្រីបានបន្តថា កិច្ចសហប្រតិបត្តិការដ៏មានសក្តានុពលនេះ ផ្តោតលើសសរស្ដម្ភចំនួនបីគឺ ១.បញ្ហានយោបាយ និងសន្តិសុខ ២.ការអភិវឌ្ឍសេដ្ឋកិច្ច និងនិរន្តរភាព និង ៣.សង្គមវប្បធម៌ និងការផ្លាស់ប្ដូរប្រជាជនទៅប្រជាជន។ ឯកឧត្ដមបានបន្ដទៀតថា ការជួបជុំអ្នកសារព័ត៌មានជាតិ និងអ្នកសារព័ត៌មានតាមបណ្តាប្រទេសជាសមាជិកអនុតំបន់ទន្លេមេគង្គនាថ្ងៃនេះ គឺជាការចាប់ផ្ដើមមួយដ៏ល្អប្រសើរ ដើម្បីចែករំលែកបទពិសោធន៍ ពង្រឹងចំណេះដឹង និងវិជ្ជាជីវៈក្នុងចំណោមអ្នកសារព័ត៌មាន នៃបណ្តាប្រទេសសមាជិក ហើយជាវេទិកាសម្រាប់អ្នកសារព័ត៌មានរៀនសូត្រពីគ្នា បង្កើតបណ្ដាញ (networking) និងពង្រឹងនូវតួនាទីអ្នកសារព័ត៌មានក្នុងការចូលរួមចំណែកពង្រឹងនូវកិច្ចសហប្រតិបត្តិការ លើកកម្ពស់សន្តិភាព វិបុលសុខ និងការអភិវឌ្ឍសេដ្ឋ កិច្ចប្រកបដោយនិរន្តភាព និងបរិយាបន្ន។
ជាមួយគ្នានេះ ឯកឧត្តមរដ្ឋមន្ត្រីក្រសួងព័ត៌មានបានបញ្ជាក់ផងដែរថា អ្នកសារព័ត៌មានអាចចូលរួមចំណែកក្នុងការពង្រឹងនូវកិច្ចសហប្រតិបត្តិការ ត្រូវមានសមត្ថភាពក្នុងរាយការណ៍ និងផ្សព្វផ្សាយព័ត៌មានពិត ត្រឹមត្រូវ និងត្រូវធ្វើកិច្ចសហប្រតិបត្តិការក្នុងចំណោមអ្នកសារព័ត៌មានឈានឆ្ពោះទៅរកការបង្កើតនូវក្លឹបអ្នកសារព័ត៌មានមេគង្គ-ឡានឆាង។ ទន្ទឹមនេះ ប្រព័ន្ធផ្សព្វផ្សាយក្នុងចំណោមប្រទេសសមាជិក មានលក្ខណៈជាទ្វេរភាគី និងនៅមានកម្រិត យើងមិនទាន់មានថ្នាល ( Platform) ដែលអ្នកសារព័ត៌មានទាំង ៦ប្រទេស ធ្វើការជាមួយគ្នា ចែករំលែកនូវព័ត៌មាន និងបទពិសោធន៍ការងារនោះទេ ប៉ុន្ដែការពង្រឹងកិច្ចសហប្រតិបត្តិការក្នុងចំណោមអ្នកសារព័ត៌មានអាចពង្រឹងគុណភាព និងភាពសំបូរបែប ប្រសិទ្ធភាពការងារ និងចំណេញពេលវេលា។
ឯកឧត្តម នេត្រ ភក្រ្ដា រដ្ឋមន្រ្ដីក្រសួងព័ត៌មានក៏បានរម្លឹកអ្នកសារព័ត៌មាន និងអង្គភាពសារព័ត៌មានត្រូវចាត់វិធានការយ៉ាងម៉ឹងម៉ាត់ ដើម្បីពង្រឹងគុណភាពព័ត៌មាន និងត្រូវផលិតមាតិកាព័ត៌មានដែលគួរឱ្យទាក់ទាញ ច្បាស់លាស់ និងគ្រប់ជ្រុងជ្រោយ សម្រាប់បម្រើផលប្រយោជន៍សាធារណៈ។ ឯកឧត្ដមរដ្ឋមន្រ្ដីអះអាងថា៖ «ស្ថាប័នព័ត៌មាន ចូលរួមក្នុងការលុបបំបាត់ដំណឹងក្លែងក្លាយ និងព័ត៌មានមិនពិត។ យើងត្រូវការប្រព័ន្ធផ្សព្វផ្សាយព័ត៌មានដែលរឹងមាំ និងអាចទុកចិត្តបាន ផ្សព្វផ្សាយអំពីព្រឹត្តិការណ៍បច្ចុប្បន្ន និងនិន្នាការ នៃថ្ងៃអនាគត»៕
ដោយ៖ ងូ សុមុនី, រូបថត៖ ហ៊ុន យុទ្ធគុណ
0 Comments