ទំនប់ម្លេចកាន់តែមានភាពទាក់ទាញភ្ញៀវទេសចរ ក្រោយកែលម្អ និងបង្កើតកន្លែងកម្សាន្តថ្មីៗបន្ថែម

ប្រជាពលរដ្ឋ និងម្ចាស់កន្លែងកម្សាន្តនានានៅតំបន់រមណីយដ្ឋានទំនប់ម្លេចបានលើកឡើងថា ក្រោយពេលមានការបើកប្រទេសឡើងវិញ កន្លែងសម្រាកកម្សាន្តជាច្រើននៅតំបន់រមណីយដ្ឋានទំនប់ម្លេចត្រូវបានកែលម្អ និងបង្កើតថ្មីប្លែកៗ។ ហើយជារៀងរាល់ថ្ងៃចុងសប្តាហ៍ ឬថ្ងៃបុណ្យទាន រមណីដ្ឋាននេះមានភ្ញៀវមកលេងកម្សាន្តច្រើនជាងមុន។

អ្នកស្រី មាស ចន្ថា ម្ចាស់កន្លែងសម្រាកលម្ហែ “បេះដូងម្លេច” បានប្រាប់ឱ្យដឹងថា កន្លែងកម្សាន្តរបស់អ្នកស្រីមិនទាន់ស្ថាបនារួចរាល់ទាំងស្រុងនៅឡើយទេ ប៉ុន្តែបានបើកទទួលភ្ញៀវទេសចរជាបណ្តើរៗ បានរយៈពេលជាងមួយខែមកហើយ។ កន្លែងរបស់អ្នកស្រីក៏មានសេវាស្នាក់នៅ  អាហារដ្ឋាន ខ្ចុះអង្គុយលេងលើមាត់ទឹក ព្រមទាំងមានស្ពានឈើសម្រាប់ថតរូបទុកជាអនុស្សាវរីយ៍ជាដើម។

ចំណែកលោក ជួប តារា ជាអ្នកគ្រប់គ្រង់រមណីយដ្ឋានធម្មជាតិម្លេច ដែលជាទីកន្លែងសម្រាកកម្សាន្តបង្កើតដំបូងគេ និងមានឈ្មោះល្បីជាងគេនៅក្នុងតំបន់នោះ បានប្រាប់ឱ្យដឹងដែរថា ក្រោយពេលបើកប្រទេសឡើងវិញ សន្ទុះភ្ញៀវទេសចរដែលមកសម្រាកកម្សាន្តនៅតំបន់រមណីយដ្ឋានទំនប់ម្លេចនេះ មានចំនួនច្រើនជាងមុន ព្រោះនៅតំបន់ទំនប់ម្លេចនេះមានកន្លែងដែលទើបតែបង្កើត និងកែលម្អថ្មីដ៏ទាក់ទាញមានច្រើន ចំណែកតម្លៃសេវាកម្មក៏សមរម្យ ដែលភ្ញៀវអាចទទួលយកបាន។

លោក ចំណាន ជាប្រជាពលរដ្ឋមានមុខរបរជាអ្នកលក់ទឹកអំពៅលើខ្នងទំនប់ទឹកបឹងម្លេច បានឱ្យដឹងដែរថា បច្ចុប្បន្នតំបន់រមណីយដ្ឋានទំនប់ម្លេច មានកន្លែងដើរលេងច្រើនសំបូរបែបដូចជា ទូកកម្សាន្ត រទេសភ្លើង ខ្សែរ៉ក សួនផ្កា និងកន្លែងកម្សាន្តជាច្រើនទៀត។ លោកបានបន្ថែមថា នៅរាល់ថ្ងៃចុងសប្តាហ៍ ឬថ្ងៃបុណ្យទាន ទំនប់ម្លេចនេះភ្ញៀវជាតិ និងអន្តរជាតិមកកម្សាន្តច្រើន ដែលបានជួយជំរុញដល់ជីវភាពប្រជាពលរដ្ឋឱ្យកាន់តែប្រសើរ។

ប្រធានមន្ទីរទេសចរណ៍ខេត្តកំពត  លោក សយ ស៊ីណុល បានបញ្ជាក់ថា តំបន់រមណីយដ្ឋានទំនប់ម្លេច បានក្លាយទៅជាគោលដៅទេសចរណ៍ដ៏ទាក់ទាញថ្មីមួយរបស់ខេត្តកំពត  ក្រោយពេលបើកប្រទេសឡើងវិញ  ហើយទៅថ្ងៃមុខ តំបន់នេះនឹងក្លាយជាបណ្តុំតំបន់ទេសចរណ៍ធម្មជាតិដ៏ប្រណិតមួយ សម្រាប់ទេសចរជាតិ និងអន្តរជាតិមកកម្សាន្ត ដោយសារភូមិសាស្ត្រតំបន់ទំនប់ម្លេចមានសក្តានុពលទេសចរណ៍ធម្មជាតិ ដែលមិនមានកន្លែងផ្សេងដូច៕

អត្ថបទ៖ AKP កំពត