អភិបាលខេត្តកំពតថានឹងរៀបចំពីធីបុណ្យអុំទូកឲ្យសប្បាយរីករាយគគ្រឹងគគ្រេង និងទាក់ទាញបំផុត

ដើម្បីអបអរសាទរ និងផ្តល់ភាពសប្បាយរីករាយដល់ប្រជាពលរដ្ឋ និងភ្ញៀវទេសចរ រដ្ឋបាលខេត្តកំពតនឹងរៀបចំពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅថ្ងៃទី៦-៨ ខែវិច្ឆិកា ឆ្នាំ២០២២ខាងមុខ ហើយបើតាមការបញ្ជាក់របស់អភិបាលខេត្តកំពត ថានឹងធ្វើឲ្យពិធីបុណ្យនេះ មានភាពអធឹកអធម គគ្រឹកគគ្រេង និងទាក់ទាញបំផុត ធ្វើយ៉ាងណាឲ្យមានអ្នកចូលរួមចាប់ពី៥០ម៉ឺននាក់ឡើង។

មានប្រសាសន៍នៅក្នុងកិច្ចប្រជុំត្រៀមរៀបចំពិធីបុណ្យអុំទូក បណ្តែតប្រទីប អកអំបុក និងសំពះព្រះខែនៅខេត្តកំពត នៅរសៀលថ្ងៃទី ១០ ខែតុលា ឆ្នាំ២០២២ ឯកឧត្តមបណ្ឌិត ម៉ៅ ធនិន អភិបាលខេត្តកំពត បានលើកឡើងថា ការរៀបចំពិធីបុណ្យអ៊ុំទូក បណ្តែតប្រទីប អកអំបុក និងសំពះព្រះខែ នៅថ្ងៃទី៦-៨ ខែវិច្ឆិកា ឆ្នាំ២០២២ខាងមុខ មិនមែនធ្វើធម្មតាៗនោះទេ ដោយសារតែខេត្តកំពតជាខេត្តគោលដៅទេសចរណ៍ដ៏មានសក្តានុពល ដូច្នេះរដ្ឋបាលខេត្តកំពត បានបង្កើតអនុគណៈកម្មាធិការចំនួន១០ ដើម្បីរៀបចំចាត់ចែង តាមផ្នែកនីមួយៗឲ្យបានល្អ ពោលគឺច្នៃធ្វើយ៉ាងណា ឲ្យមានភាពសប្បាយរីករាយ អធឹកអធម គគ្រឹកគគ្រេង និងមានភាពទាក់ទាញបំផុត ដែលនឹងមានអ្នកចូលរួមចាប់ពី៥០ម៉ឺននាក់ឡើង។

ហើយការរៀបចំពិធីនេះ មិនមែនត្រឹមតែដើម្បីផ្តល់ភាពសប្បាយរីករាយជូនដល់ប្រជាពលរដ្ឋ និងភ្ញៀវទេសចរប៉ុណ្ណោះទេ តាមរយៈការរៀបពិធីបុណ្យនេះ ដើម្បីទាញយកប្រាក់ចំណូល ជូនដល់ប្រជាពលរដ្ឋខេត្តកំពត ដោយផ្ទាល់ និងប្រយោលផងដែរ។

បើតាមការគ្រោងទុក ក្នុងពិធីបុណ្យអុំទូកខាងមុខ នឹងមានកម្មវិធីប្រណាំងទូក. ង. ខ្នាតប្រពៃណី ការប្រកួត និងបង្ហាញក្បាច់កុនល្បុក្កតោ ការប្រគំតន្ត្រី ការសម្តែងរបាំបុរាណ និងសម័យ ការពិព័រណ៍ផលិតផល ភូមិ១ផលិតផល១ បង្ហាញអំពីសក្តានុពលខេត្តកំពត ការបាញ់កាំជ្រូច បង្ហោះគោម និងបណ្តែតប្រទីប និងកម្មវិធីសប្បាយៗជាច្រើនទៀត។

បើតាមការបញ្ជាក់របស់ ឯកឧត្តម អភិបាលខេត្ត នៅក្នុងពិធីបុណ្យនោះ ឯកឧត្តម ជំរុញលើកទឹកចិត្តដល់ មន្ត្រីរាជការ និងបងប្អូនប្រជាពលរដ្ឋទូទាំងខេត្តដែលមកចូលរួមពិធីបុណ្យ ឲ្យស្លៀកពាក់តាមបែបប្រពៃណីខ្មែរទាំងអស់គ្នា ហើយរដ្ឋបាលខេត្តបានត្រៀមអំបុក ចែកទុំ និងដូងរាប់តោនដើម្បីទុកទទួលប្រជាពលរដ្ឋ និងភ្ញៀវទេសចរដែលអញ្ជើញមកចូលរួមផងដែរ។ ចំពោះការប្រណាំងទូកមាន១២គូ រៀបចំធ្វើឡើងនៅលើដងព្រែក តំបន់ឆ្នេរកោះស្មៅ៕

អត្ថបទៈ មន្ទីរព័ត៌មានខេត្តកំពត